Kami tolosalamat ahiq hi Tumpu Yesus, anu madiq ko anu moliu-liu, anu mosipatangkas, anu sajaq mae monsangalui kami kaq nombalakaatimo mae aiya anu binau mami, susumo aitu mombau kaq molalinakon unde-undeqan nu Salaniq i basaq nu Saluan.
Unde-undeqan aiya ko anu kinumpun, ilalinakon, kaq pinosibau nu to oli-olitau kaq to lalangkoyang, anu nomposaanguq tangaq da montinjohakon basaq u Saluan. Susumo aitu tuqa-tuqanyo nu posaanguqan na i Ekki Wiliams anu lengkat i Kamumuq, tiba muleq susumo aitu to sanga-sangalunyo na i Nerub Lalan, kaq i Ronal Moilis, kaq i Hawanis Lalan, kaq i Uweni Lalan, kaq i Noviani Sindulat anu lengkat i Lokait. Tiba muleq susumo aitu i Annika Hummel anu lengkat i Jerman, tiba ha i Rilian Dadung kaq i Nerolin Dadung anu lengkat i Buluq na anu mompokoimaqi kaq momposoop lagu i komputen.
Daagiq muleq ko undeqan anu kinumpun mami, anu binau kaq ilalinakon anu lengkat hi hai Pak Desmon Kalintabu anu lengkat i Tolitan, kaq i Pak Eloong anu lengkat i Lokait.
Tiba muleq ha i Bapak Leong Tzi Ping tiba i Ibu Heidi Leong-Muentener na monsampusi kaq momposadia apaa na anu opalalu nu posaanguqan mami. Samian toka samian na ko posi kapandean anu madiq pokakana, susumo aitu mombau kaq molalinakon unde-undeqan. Tiba susumo aitu mombau nada da timbali maimaq na ohongo da bau pongundeqan Tumpu.
Kami ko kahandaq ahiq da iwi-iwiq a mian monsumbuq anu bineeq nu Tumpu hi kita mian, aitumo basaq. Da tiba basaq kita mian timbali mongepeq kabai mompia Tumpu i kantumuuqanto anu molumui kinyonyoa nu mian anu sajaq monginauq Tumpu, da misaq ahiq ko laa baladoqa kaq mombasaq Alakitaap, panyo tiba unde-undeqan kita timbali monginauq anu binau nu Tumpu hi kita anu nompotimbali kita mian buqoi. Palalu ahiq na kita mian montinjohakon adat kaq mobasaq u basaq u posi butong.
Manjooq ahiq na mian mongkaimaqi mohongo nyanyian, mokonyoq kami ko kinyonyoa mombau nyanyian nu basaq u Saluan, da manjooq a mian timbali monsumbuq unde-undeqan aiya. Tiba nyanyian aiya, kahandaq mami, da samian toka samian kita timbali monsumbuq basaq anu bineeq nu Tumpu hi kita. Tiba muleq, kita mian timbali mompia kalibosan nu Tumpu i kantumuuqanto. Makaq ko mian ahiq anu maliaq maosa, na de laa mohongo sisik anu mantan kaq singkaap pokakana, panyo ko mian ahiq anu mongkaimaqi mohongo nyanyian pongundeqan Tumpu anu molumui kinyonyoa.
Kami singkona ahiq montabeaq de ko nyanyian anu pinosoop mami, panyo anu misaq pinosibau, kaq kami madiq nompotulis sanggo nu mian anu nombau. Saabaq kami madiq nonsumbuq anu nombau nyanyian aiya.
Unde-undeqan aiya anu bau pongundeqan Tumpu, kinumpun mami kaq pinotimbali i saanguq a buuk, kaq timbali singkona oala lengkat i "Play Store" kaq opounaq i HP.
Laa ahiq aitu na anu pinokosisik mami, Tumpu Yesus na mombalakaati!
